المربد
30-05-2004, 11:26
بالكشتات، عندي ربع متفاهمين نطلع على طول مع بعض، وحنا عارفين برنامجنا من حيث التكاليف المالية، او التكاليف العملية، يعني متوازعين الاغراض اللي نجيبها والاشغال اللي نسويها مثل فلان عليه العشاء، وفلان يحب يتفنن بالفطور، والغداء من تخصص فلان، وعندنا عين السيح ابو ابراهيم عليه القهوة والشاي من ينزل من السيارة ماله شغل باحد كل همه يولع النار ويحمس ويدق القهوة ويزل الدلة ويخدر الشاي. تشربون او ماتشربون تراها جاهزة.
تسلم يا بوبراهيم !!
طبعا هذي كشتاتنا الخفافية يعني خميس وجمعة.
واحيانا يطلع معانا بهالكشتات بعض الربع زياده على الفريق اللي قلت لكم، عاد بعض هالزيادة يصير نشمي وهب ريح لكن وين !! ما يقايش مع ابو ابراهيم، وبعض الرجاجيل اللي معاي.
بعض هالزيادات يصير ما يعرف شيء بالبر، فيكرمنا بوجودة وخفة ظله لان حنا طالعين وناسة وسعة صدر فتلقاه يسولف وينكت ويتذكر مواقف زينة واحيانا يحدث علينا بمواعظ ويشجع فلان وطبخ فلان ويشجع اللي يشتغلون، ها تبون فزعة؟ او عطوني اقطع معكم !! اواش تبون اسوي معكم، يعني يخفف نفسه ولو بالكلام، فتلقاك تخدمه وانت ممنون..
وبعضهم اللهم يا كاااافي، تقول شايل معك رحاة، او صفاة، تخبرون الرحاة شلون ثقيلة يعني ينطبق عليه قول القايل: نفس خايسه بجلد معفن !!
لا يشتغل ولا يعجبه الشغل ولا يسولف ولا يتمشى ولاولاولاولا ، شـنهي هاي !!
(صاق صدري من ذكره وناوي اذكر صفاته ولكن هونت)...
عادة نوصل مسيان، يعني قبل المغرب بنص ساعة تقريبا ونعاين مكاننا ونتواسى قبل المغيب والظلام، ونفل عفشنا ونشب نارنا عاد اغلب الاحيان انا اللي علي العشاء وطريقتي اني اتكتر عن الربع شوي واقعد بمكان اشتغل به بروحي بس عندي الراديو افتحه واحطة عندي واقعد اقطع واغسل واطبخ، وكل الربع يعرفون نظامي يجون يسولفون ويمزحون ويروحون كل بشانه.
مرة كان طالع معنا واحد من اللي احبهم اللي قلت لكم عنهم خفيف ظل وحبيب.
جاء عندي وقعد يسولف والراديو مفتوح وقعد يمسك لي وانا اقطع قلت له ها بعد وش اخبارك يا بو احمد؟
قال والله اليوم بالدوام عندنا مستخدم جاء يطلب سلفه حق غذاء جايـيـنـه ضيوف وما عنده يغديهم.
قلت وش سويت له؟
قال كسر خاطري هالرجال وطبعا اعطيته.
قلت وليش كسر خاطرك؟
قال انه عنده مشاكل اسرية ومصاعب مادية و و و !!.
مديت ايدي على الراديو ووطيت صوته حيل.
قلت له يا بو احمد ... تدري ليش حنا طالعين للبر؟
قال تغيير جو !!
اي جو؟
جو الديرة.!!
قلت له سلمك الله حنا طالعين نبتعد عن همومنا، هموم انفسنا حتى نرجع وعندنا قدرة على تحمل مصاعب الحياة اليومية لانفسنا ولعائلاتنا. وانا بصراحة تعلمت اني ما ارمي همومي على الناس وبنفس الوقت ما اسمع منهم اي مشاكل شخصية واذا سمعتها ما اتقمصها واعيشها يعني ما استمع لهم وادخل بالسالفة لدرجة اقول "والله لو انا بمكانك كان ...." واقعد منقهر وضايق صدري على فلان اللي قال السالفة وراح، وهو راح عني ونساها وانا بعدني متحسر عليه، بل يمكن تكون في موضوع ربما ما اقدر اساعده فيه، ولا اقدر اسوي له شيء.
يا بو احمد انا ما اقول ما نفزع اذا جانا عاني، ولكن اقول نتريث علشان نعرف متى نفزع ويكون للفزعة فائدة ويصير لها حدود وما تصير نوع من اللقافة.
لأن فيه ناس يلتزم مع هذا، ويواعد هذاك، وعنده دايره مع اهله وعياله عندهم مطاليب وووو ولايكلف الله نفسا الا وسعها، ويشط نفسه وما يصير عنده وقت يفكر بحاله، وزود عليها يصير مقصر بهالالتزامات بسبب عدم تنظيم نفسه.
عاد ايشلك بالطلايب اغفل عن الناس وانتبه لنفسك، واذا طلب احد منك شيء وقتها تكون حاضر له وتصير الفزعة بمحلها. وينتهي دورك بنهاية الفزعة ويصير عندك وقت تطلع به للبر وتستانس مع ربعك او مع عيالك...!!
صح والا لأ؟؟
دقت اخبار لندن ورفعت صوت الراديو وسكت ابو احمد يسمع الاخبار...!!
تسلم يا بوبراهيم !!
طبعا هذي كشتاتنا الخفافية يعني خميس وجمعة.
واحيانا يطلع معانا بهالكشتات بعض الربع زياده على الفريق اللي قلت لكم، عاد بعض هالزيادة يصير نشمي وهب ريح لكن وين !! ما يقايش مع ابو ابراهيم، وبعض الرجاجيل اللي معاي.
بعض هالزيادات يصير ما يعرف شيء بالبر، فيكرمنا بوجودة وخفة ظله لان حنا طالعين وناسة وسعة صدر فتلقاه يسولف وينكت ويتذكر مواقف زينة واحيانا يحدث علينا بمواعظ ويشجع فلان وطبخ فلان ويشجع اللي يشتغلون، ها تبون فزعة؟ او عطوني اقطع معكم !! اواش تبون اسوي معكم، يعني يخفف نفسه ولو بالكلام، فتلقاك تخدمه وانت ممنون..
وبعضهم اللهم يا كاااافي، تقول شايل معك رحاة، او صفاة، تخبرون الرحاة شلون ثقيلة يعني ينطبق عليه قول القايل: نفس خايسه بجلد معفن !!
لا يشتغل ولا يعجبه الشغل ولا يسولف ولا يتمشى ولاولاولاولا ، شـنهي هاي !!
(صاق صدري من ذكره وناوي اذكر صفاته ولكن هونت)...
عادة نوصل مسيان، يعني قبل المغرب بنص ساعة تقريبا ونعاين مكاننا ونتواسى قبل المغيب والظلام، ونفل عفشنا ونشب نارنا عاد اغلب الاحيان انا اللي علي العشاء وطريقتي اني اتكتر عن الربع شوي واقعد بمكان اشتغل به بروحي بس عندي الراديو افتحه واحطة عندي واقعد اقطع واغسل واطبخ، وكل الربع يعرفون نظامي يجون يسولفون ويمزحون ويروحون كل بشانه.
مرة كان طالع معنا واحد من اللي احبهم اللي قلت لكم عنهم خفيف ظل وحبيب.
جاء عندي وقعد يسولف والراديو مفتوح وقعد يمسك لي وانا اقطع قلت له ها بعد وش اخبارك يا بو احمد؟
قال والله اليوم بالدوام عندنا مستخدم جاء يطلب سلفه حق غذاء جايـيـنـه ضيوف وما عنده يغديهم.
قلت وش سويت له؟
قال كسر خاطري هالرجال وطبعا اعطيته.
قلت وليش كسر خاطرك؟
قال انه عنده مشاكل اسرية ومصاعب مادية و و و !!.
مديت ايدي على الراديو ووطيت صوته حيل.
قلت له يا بو احمد ... تدري ليش حنا طالعين للبر؟
قال تغيير جو !!
اي جو؟
جو الديرة.!!
قلت له سلمك الله حنا طالعين نبتعد عن همومنا، هموم انفسنا حتى نرجع وعندنا قدرة على تحمل مصاعب الحياة اليومية لانفسنا ولعائلاتنا. وانا بصراحة تعلمت اني ما ارمي همومي على الناس وبنفس الوقت ما اسمع منهم اي مشاكل شخصية واذا سمعتها ما اتقمصها واعيشها يعني ما استمع لهم وادخل بالسالفة لدرجة اقول "والله لو انا بمكانك كان ...." واقعد منقهر وضايق صدري على فلان اللي قال السالفة وراح، وهو راح عني ونساها وانا بعدني متحسر عليه، بل يمكن تكون في موضوع ربما ما اقدر اساعده فيه، ولا اقدر اسوي له شيء.
يا بو احمد انا ما اقول ما نفزع اذا جانا عاني، ولكن اقول نتريث علشان نعرف متى نفزع ويكون للفزعة فائدة ويصير لها حدود وما تصير نوع من اللقافة.
لأن فيه ناس يلتزم مع هذا، ويواعد هذاك، وعنده دايره مع اهله وعياله عندهم مطاليب وووو ولايكلف الله نفسا الا وسعها، ويشط نفسه وما يصير عنده وقت يفكر بحاله، وزود عليها يصير مقصر بهالالتزامات بسبب عدم تنظيم نفسه.
عاد ايشلك بالطلايب اغفل عن الناس وانتبه لنفسك، واذا طلب احد منك شيء وقتها تكون حاضر له وتصير الفزعة بمحلها. وينتهي دورك بنهاية الفزعة ويصير عندك وقت تطلع به للبر وتستانس مع ربعك او مع عيالك...!!
صح والا لأ؟؟
دقت اخبار لندن ورفعت صوت الراديو وسكت ابو احمد يسمع الاخبار...!!