http://www.miraatzubair.com/vb/attachment.php?attachmentid=2967&stc=1&d=1322131968




http://www.miraatzubair.com/vb/attachment.php?attachmentid=2968&stc=1&d=1322131980

جَعبـ لاجي



http://www.miraatzubair.com/vb/attachment.php?attachmentid=2969&stc=1&d=1322131993

الكعب (الجّـعب): نقولها بالجيم الفارسية المثـلثـة، عظم في مفصل ساق الخروف وهو في كل البهائم وهو مكعب الشكل تقريـبـا مائـل للاستطالة.

لعبة الشباب المفضلة في الايام الخالدة ، ، ،
يحرصون على تجميع الجـّـعاب، واكثر ما يجمعونها بالاضحية اذا كثر اللحم والكراعين، تلقاهم يمصونها مص الى ان ما يبقى بها شيء يصلح للنمل، ثم ينشرونها على السطح وبعضهم يدفـنـونها بـتراب السطح لكن اذا اندفنت تصير ضعيفة بسرعة تنكسر.
ثم عاد اخذ تـنـطـط اولاد الجيران على السطوح وسرقة الكنوز المدفونة.
ومع هذا يبقى بها اثر غـضاريف ودسم.
بعض الاحيان ياخذونها قبل الطبخ من المقصب فيضطرون يطبخونها بماء وملح علشان يتخلصون من العصب والدسم
ولازم يكون مع كل لاعب جـّـعب مخصص يسمونه الصول، وهي اللي يضرب بها الجّعاب والصول تـنـتـقى من الجعاب و لها موصفات خاصه منها :
كبر حجمها
وان يكون لونها عند وجودها بين الاسود والبني (علشان ماتـفـتـت اذا طقيت بها الجعاب)
ان تكون قدر المستطاع مستطيله (علشان تساعدك على البرم وتصيب)
واذا اختاروا الصول يحفرونها او يجوفونها ثم يصبون بها رصاص علشان (تلجـّـي) يعني تصير ثقيلة. ويزخرفونها كل واحد يـتـفـنـن في زركشة الصول حسب مزاجه ويستعيـنـون اما بالكركم او الحناء او البويه ان وجدت.!!
المهم انك تلونها وبس و يحطون فيها جـير (اسفلت) ويغرزون به قمور (دبابـيـس ذهبية مثل حق المراكي يشلعونها من صندوق العجوز اللي مصنوع بالهند)

طريقة اللعب:
تـتـم برسم دائره في الارض تسمي الخطة قطرها حوالي متر ونص ثم يخط خطين على جوانب الخطة بما يشبه رقم مائة وواحد بالانجليزي l 0 l يسمى الخطين المدعي او الميد، وبالميصة يسمونه (شــيـجّ)
يحطون الجعاب داخل الخطة في وسطها اما بشكل صف او صفين حسب كثر الجعاب. ويوقف الاولاد على خط الميد متقابلين.

ثم يبدأ الشخص اللي عليه الدور ويرمي الصول على الجعاب اللي في الدائرة واذا صابهن وطلع شيء منها خارج الدائرة فهي من نصيبه، ويستمر يلعب والثاني يتفرج الى ان يخطئ الاول يعني ما يطلع شيء خارج الدائرة او يطلع الصول معاها.

بعد ذلك يـنـتـقـل اللعب الى الشخص الاخر
واحيانا يقوم المغلوب ويسوي (جـّـور) او يجي احد من بعيد ويسوي جّـور على الجعاب ويقشهن وينحاش.
والجـّـور حالة سرقة نـتـكلم لكم عنها بعدين.

وقبل اللعب هنالك شروط يتفق عليها وذلك حسب نوع الصول و نوع الجعاب اللي تحطها في الدائرة هل هي نوع صغير او من النوع الكبـيـر حيث ان التحدي دائما في النوع الكبـيـر ويصير التحدي القوي اذا حط احد اللاعـبـيـن صول بدل الجعاب ويقول لك (تلاعبني من صول) والله يعينك اذا غلبته واخذت صوله، يـبلشك بالصياح والحنـّة، واذا صرت انت كريه ومارجعته له يروح يتشكى عند ابوك او امك وتاليتها ..!! يا عيني ، تـنـجـلـد:
" ليش تلاعبه مادامك تدري انه، دعلة صياح"
" شف عاد ترا ان لعبت معه مرة ثانية نشرت جلدك على الطوفة "
وياكثر ماينشرون جلودنا على الطوَّف
ومن بكرى الصبح ننسا ونلعب .

علامات راعي الجعاب:

اصبعه الي يـبـرم به خاصه الشاهد (السبابة) دايم معكوف من كثر ما يرص على الجعب.
مخابي دشداشته مليانة زيت يعني الثوب ابيض صحيح ( ايه هين ) ولكن المخابي بـنـيـّة من الدهن والتراب.
تلقي الذبان يحوم حوليه دايم
مايل على جنب (من ثقل الجعاب والصول اللي معـبـيـه رصاص)
دايم يروح للمقصب ( يسابق البزازين والكلاب على العظام)

اترك المجال للاخوان للادلاء بدولهم...!!!



وانا من الحين عارف ايش يبي يقول بعض الناس عني ولكن احلف لكم بالله اني ما لحقت العبها ابد، يعني انقرضت قبلي ...!!

الله .. خوش لعبه هذي وين ساهررررر ؟
وكذلك وين ولهان يحط لنا صورة عن الجعاب ؟
حنا كنا نسمع فيها ولم أشاهدها أو ألعبها ..
يمكن لأننا ساكنين في ستيسنتر ، وما نلعب غير الجقات والدوامات
ومثل هذي من لعب شباب طراف المدينة والقرى والأرياف ..
لأننا آنيقين ، وما نحب نوسخ هدومنا .. لأننا نلعب بجقات مغسولة بالصابون ..

مربدنا
يقولون الكحل حرام
يقولون ام صدى حرام
ويقولون الازلى مايلعب

لعبة رياييل مو اللى يلعبون طمة مع البنات وكله يدوفون بالتراب
راحت يالمربد وخلها على الله

أخوي أبو يوسف
أذا أكو درجة أكثر من 100 أو الممتاز أعطيك أياها على :

دقة التفصيل و التجميل
من رجل كريم ما هو بخيل
يظهرلك فجأة مثل سحير الليل
بأحسن المواضيع من الحجم الثقيل
اللي الشوق و الوله معاها دومه عليل
لا ومْن مَن .. من مربدنا أبو خصر نحيل
اللي مع نسيم الصبح يتبختر بعنفوان و يميل
جعاب و جعاب يا ما دفناها يم الباب و البراميل
أذكر صول غلبته وظل صاحبه طول يومه دمعه يسيل
(عربيد) صولى أحس أسم عطيته وبين الربع ما له مثيل
ليت رب يغفر لنا زغاليطنا و أحلوفنا كذب ما له أي دليل
طلحه عايش ماضيه بذكراه و ليت بحاضره يرد له الجميل

أخوكم/طلحه

السلام عليكم

هكذا تورد ياالمربد الجعاب ( الإبل ) ، والله عرض جميل ووافي ، غطى
اللعبة وحواشيها من منافسات وتجهيزات وغيرها ، الله يعطيكما العافية
أنت وإللي سولف لك عنها ، وحدثك بها ..

أضيف شغلة صغيرونه في أوصاف ( الجعب / الصول ) ، وهي يفضّل أن
يكون ( أزْلي ) يعني جهته المسطحة تكون ملساء بدون نتوءات حتى
إذا رماه اللاعب ( للتكحيل ) وهو العملية التي يفتتح بها اللعب للقرار على
من يبدأ ، فإنّ الكعب ( يلجي - بالجيم الفارسية ) أي يقف معترضآ على
جنبه ولايسقط على بطنه أو ظهره .. والتكحيل أحيانأ يكون ذاته منافسة .(( لذلك قال أبو بدر فوق : الأزلي ما يلعب ))
كما أن الكعاب منها ماهو أيمن ومنها ماهو أيسر .. اللا عب يختار منها ما
يناسبه ويكون سهل عليه أرجحته ثم الرمي به من على الميد للخطة ..!!

الصراحه يالمربد اني اشك انك داز واحد للأستراحه يتجسس علي لأني يوم الخميس مجتمع مع شياب وقاعد أسئلهم عن اللعبه والمسميات وقاعد أكتب بهلأوراق ....

المهم أشوني مانزلتها لأنك ماشاء الله مبدع بالتفصيل والشرح ولقد أجدت الوصف بأمتياز كالعادة
وبالمناسبة كان هنالك أختلاف بالرأي عن معنى كلمة ( يلجي ) وكذلك على مسمى لعبة الخطاوين ....فما هو الصحيح ؟

بارك الله فيك (يالمربد) على اسلوبك الشيق ونحن ننطر منك المزيد

"الجعاب" لعبة معروفة كنت أشوف الأولاد الأكبر مني يلعبونها لما أزور الأقارب يلعبونها في السكه, والحين ياريت تشرحون لعبة "المحيبس" عادة يلعبونها في الشتاء.

وكانت هناك لعبة للأسف نسيت أسمها وهي عبارة عن حبلين صغيرين مربوطين بقطعة جلدة يضع فيها حجر صغير يدور الحبل ويطلق للأصابة هدف معين.
اذا ماخانتني الذاكرة تسمى "الحرابه"

أتمنى التصحيح

ساهرررر

أخوي الساهر
هذه تسمى " المعجاله " و هي كما وصفتها تستخدم للحرابه.
أما المحيبس فدور لك على الأبو يشرح لك قوانينه.
و سلامتك يا غالي

شنهو هذا المعنى ؟

فوق : الأزلي ما يلعب ..
وين أبو بدر أو المربد أو عبداللطيف .. خلهم يشرحون لنا معناها

السنة الماضية أقيم مهرجان ختام العام الدراسي في الدمام
ومن ضمن فعاليات هذا المهرجان يوجد فقرات من التراث الشعبي
وكانت فقرة لعبت الجعاب ياحجي من هذا التراث
وكان البزارين يضربون الجعاب بعصاة بدلا من اليد ياحجي :confused:
انا فكيت حلجي وآستغربت من هذي اللعبة :ياحجي confused:
سؤالي للمربد هل انتم تلعبون مثل هذي اللعبة :confused:

القلم ، الغالي،
اشكر مرورك وما كتبنا هالموضوع الا علشانك انت وامثالك من الشباب حتى يتعلمون شيء يسولفون به مع الكبار.

ابو بدر ، يا وردة ملأ الضفاف جمالها،
نورت الصفحة ولو اني احس كأن الموضوع اثار شجون بل وعبرات ولكن هذي الدنيا.

طلحة ، جد الفرحة،
فرحت بمرورك وتعليقك ، بس ايش رايك تاخذنا يوم تسوي لنا دورة تعليم الجعاب.

استاذ عبد اللطيف
ما عندي الا بعض من ما عندكم، وانا مجرد بذرت البذرة وآمل ان ترعونها بمعلوماتكم وانشائكم,
سعدت سعادة كبيرة بمرورك واعجابك بالموضوع.

أنا لا أستطيع أن افهم كيف يلعبون بعضمه smil72
علموني كيف اللعب في عظام smil72

أخوي المربد أنا مستعد نسوي دوره في تعليم لعبة الجعاب ولكن يجب توفر مايلي:

1- ربعك ..... هل عندهم لياقة أصابع لكي يمسكون الجعب بقوه؟ وأن فعلو يبلهم كلينكس ليمسكوا الجعب.
2- هل خشومهم عندها لياقة شم روايح العصب و اللحم و الشحم؟ ,ان فعلو يبيلهم معطر و ملطف جو.
3- هل مستعدين يحطون الجعاب بمخابيهم؟ وأن فعلو يبيلهم علبة خاصة لتجمع بها.
4- هل مستعدين يخطون دائرة مصدي أو طنب في التراب أكيده يبونه على الرخام أو السيراميك أو الكاشي؟.
5- هل عندهم أستطاعه يحنون الجعاب و يدهنونها بزيت سراي و يصبون بوسطه رصاص أو جير؟.
6- هل يقدرون يلعبون بعز الظهاري بالشموس الحمراء أو في قاعات مكيفه؟
7- هل يستطيعون الذهاب للمقصب من فيور الله لتلقيط الجعاب من الذبايح؟
8- لكن الحمد لله هذه الجعاب ما هي موجوده عند الفالح أو غرناطه للرياضه .
9- بس ما أدري يمكن نلقى لها cd وتنلعب مثل الأتاري.
10- حبيبي كل زمان و مكان له رجاله ناسه و لا قصور بأحبائي القراء و الأعضاء.

وتشكر يا حبيب المربد على هذا المقال الفريد القيم و منك دائما عودتنا على كل شي عتيج ويديد.

نطلب منكم السموحه.

طلحه أبو الردحه

اخوي الولهان ، القصد توصيل المعلومة والفائدة للجميع خصوصا الجيل الجديد. واما الاختلاف الذي ذكرته فما بينت لي شنهو؟ لعل عندي او اي احد الاخوان اجابة.


الساهر ،
احسن شيء ان امثالك يفهمون الموضوع ، والحرابة موضوع قديم يمكن انك اطلعت عليه.

البحر،
ياحجي ما هذا اللي نـتـأمله منك
اكيد عندك علوم من الاولين ولكنك متغلي علينا.


الضمير السامي،
لعبنا بصلابـيـخ ، ولعبنا بفصم ، ولعبنا بمصاقيل (جقات).
وما الفرق بين العظام والعاج ، ما تلعبون بالزهر وهو من العاج ، وقطع الشطرنج الغالية تكون من العظام والعاج؟ وسع صدرك.. لأن الاصل النية والضمير اذا صار صافي كل شيء يصلح.

صح والا لا؟

اخوي طلحة ترى الحين فيه عظام بلاستيك حق تدريب الكلب (اكرمكم الله).
يعني توقع لو نطلبها من الصين يرسلون لنا جعاب بلاستك ولها الوان ومقاسات بعد.

توقع شلون يصير شكل (عربـيـد) المستورد

السلام عليكم ورحمة الله وبركاته.
الكِعَاب ومفردها كَعبٌ :وهي العظم لكل ذي أربع ؛ والكَعْبُ : كل مفصل للعظام
وكعب الانسان : ما أشرف فوق رسغه عند قدمه ، وقيل : هو العظم الناشز فوق قدمه . وجمع الكَعْبِ كِعَابٌ .
وقيل الكعاب: فصوص النرد ( لسان العرب).
ولعل هذا ماخصه النهي والله أعلم في الحديث
عبد الله بن مسعود قال: "نهى رسول الله { عن عشر خلال، عن تغيير الشيب، وعن نتفه، وعن الصفرة، وعن إسبال الإزار، وعن عقد التمائم، وعن ضرب الكعاب، وعن التعوذ يعني التعويذات، وعن التختم بالذهب وعن التبرج بالزينة لغير محلها، وعن عزل الماء عن محله}
أشكرك أخي المربد على حسن العرض والتفصيل .

علشانـ المربد بحثت عن جعابـ..

حمداً لله وجدتـ هذه الصور ورفعتها في المرآة للحفاظ على هذا التُراثـ..
صور، لعبة الطنبـ في الجعابـ، والجعبـ العادي، والجعبـ اللاجي..

علماً لم ألعبـ هذي الجعابـ، أنا من جيل الجقاتـ(المصاقيل)، (الدُعبل)، (التيل)..

تحياتي لكاتبـ الموضوع الغائبـ الحاضر..

:تصفيق

القلم
يقولون قبل
للشخص المحظوظ
جعب أزلي
وين ماتذبه
كحل