اشتهيت البارحة اسيـّـر على الاستراحة، لأن صار لي مدة ما رحت هناك. تخبرون الاربعاء الماضي انا قايل لكم اني ما رحت علشان السبب اللي ذكرته لكم ...
وهناك اسباب ظهرت بعدين ما ادري من اين جابها البيق واخوه طلحة اتهموني بها ظلما وما اقول لهما الا : "كل ٍ يشوف الناس بعين طبعه".
والخميس كان مطر شديد هـمّـيـن ما قدرت اروح، اوووه نسيت ما قلت لكم شــســوينا الخميس !!! بعدين،، بعدين ... لها موضوع ثاني، الحين انا بخاطري سالفة عساي اقدر اكملها.

الشــاهد ، دقيت الديرمة ولقيت ام جواد محضرة لي صحـيـن طـِـعـمه للربع هناك واخذته وياي وطلعت ولقيت لك المنـتـزهات تد ّهــر تخبرون عقب المطر وعقب نهاية اختبارات شهرية والناس صايرين مثل ام رايش. ما صدقوا طق المطر الا طلعوا بعيالهم "يشمون هواء "

وهذا يـبـيـع دوندرمة وهذا لبلبي وهذاك حب شمسي، ولقيت واحد يـبـيــع نـبـق اشكال منها كبار وصغار وشيء منه بفصم وشيء بدون فصم، قبل يسمونه (ملاسي) ،،، وقـفت عنده وتلاهدت وياه ، هذا بكم؟ وهذا بكم؟ واذا ابي تشكيله بكم تصير؟ وبالاخير كسر خاطري وشريت منه
ولقيت واحد يبيع اقط تعرفون الاقط؟ يا حجي عليه بصمات ظاهره وبعض الحبات فيها طبعة الاصبع ومبـيـن المحبس اللي بالاصبع. وعنده ناس يشترون قلت وين الزين قال هذا ، وبكم هالزين ، وآخر سعر وو ... وبعدين تذكرت شاعرهم اللي يقول :
تلقاه مشرور على شارف البيت ابيض عليه من الغنادير توقيع
مالت على الغنادير اشوف طبعات خنصرها كبر ابهام رجلي !!!

خليته ورحت لسيارتي وكيس النبق حطيته على الكشن ، يا حجي ،، فتحت الجامه وقمت اصعـّـد على السيارات اللي وراي بقذائف فصم النبق الى ان وصلت الاستراحة. لقيت البنغلاديشي مخدر الشاي على الفحم وابو عبد الرحمن واصل قبلي وشارب له بيالة وطاق له صفنه، يعد النجوم ، ...
سلمت عليه وكالعادة البنغالي تناوش الشماغ والعقال وعلقهن على المسمار، قلت لابوعبدالرحمن لا تعد النجوم ترى يطلع بايدك ثواليل. حطيت الصحن اللي من ام جواد وصب لي الحارس بيالة،
قال لي ابو عبد الرحمن هل يمكن للشاب انه يكره ابوه؟

ويــه انترست الصفحة والحين يهاوشونـي الربع على طول الموضوع.


والله ما ودي لكن تعبت من الطباعة.بعد شوي ارجع ان شاء الله ما اطول

شفتوا قلت لكم ما اطول.



يا جماعة انا ملاحظ هالايام ما تقعد مع واحد الا وقام يشتكي من تصرفات عياله !!!
ما ادري هو الوقت تغير، اوالشباب تغيرت مفاهيمهم، او ان خوف الاباء على اولادهم زاد لدرجة انك تحس ان الولد صار يشكل مشكلة عويصة في بعض البيوت.
والسبب هو هالهجوم على الشباب من الاعلام والاتصالات والفساد.
واذا احد سال المختصين او التربويين ما يلقى عندهم غير محاضرات وحلول نظرية او غير واقعية، تخلي الآباء يـتـيـهــون.

سلامات يا بو عبد الرحمن شصاير؟
قال شقول لك:
عناد، وما يتفاهم، واللي يشوفه او يسمعه من ربعه هو الصحيح، كسلان،
وامه ملت منه، وانا تعبت وياه وماني عارف شــســوي ؟ وودي اطـقـه وابرد قلبي !!!
لا يا بو عبدالرحمن الله يهديك تطق رجال طولك...
لكن تدري شلون خلنا نعلق هالمشكلة بالمنتدى ونعرضها على اخوانا بالمنتدى، قال المرة الماضية علقت مشكلة ابو احمد وما فادوه.

دنيت التكاية عنده وقربت له من هاللي بالصحن قلت للحارس صب لنا بيالتين لومي، وسع صدرك خيرته يكبر ويعرف بس خلنا نشوف الربع بالمنتدى شيقولون.

الموضوع مو سهل أولا للأختلاف العقليات والجيل وثانيا من الصعب أن يتنازل الوالد ويسمع كلام أبنه وهذا خطاء يقع فيه كثير من الآباء مرة قرأت في المنتدى يقول بما معناه خليت الوالد يتكلم ويهربد واللي برأسي أسويه أقول في داخل نفسي ، وهذا واقع أغلبنا لكن الآن صعب الحل يمكن يحاول شئ واحد وهو يجرب أن يصادقة ويحاول ان يدخل له من شئ يحبه مثل يدخل بسولاف التفحيط والسيارات اذا كان يحب يربي حمام مثلا أي شئ يحبه الولد علشان يبدأ أبوه يسطير على ولده بأشياء يحبها يخليه يحاول وعلى فكرة كل الذي حدث بسبب أمريين ممكن الدلال أو أبتعــشاد الأب وأنشــغاله عنه مما جــعله يبحث عن شئ يسد هذا الفراغ حتى تعود عليه

أقول قولي هذا . . فما كان فيه من صواب فمن الله وحده . . ومن كان فيه من خطأ أو زلل أو نقص فمن نفسي والشيطان


ساهر

تلقاه مشرور على شارف البيت ابيض عليه من الغنادير توقيع
مالت على الغنادير اشوف طبعات خنصرها كبر ابهام رجلي !!!


ولك منين يبتا هاالبيتين قعدت اضحك مثل المينون

المربد تراك اذيتنا ما عندك مواضيع تونس حاط دوبك دوب هاليهال

لكن عندي كلمه ابقولها لو تزعل شوي ، ياجماعه المتأخرين منا من بقو في الزبير اقصد الى قريب الثمانينات وما بعدها تذكرون شلون صارت اخلاق الشباب بزبير ارجوكم لا نكابر وخلونا نقولها بصراحه الي صار وهذا الكلام للي ابتعد عن الزبير وما رجعلها ابد ولو زياره جماعه رقم وتاريخ ، الي صار انه صاروا اهل الزبير السكان بداو يتناقصون ، وكثر الوافدين علينا من الشيشيه والحيانيه والطويسه وخمسه ميل ، ويحدثني احد الاخوان الى رجعوا من الزبير اخيرن يقول سالت واحد من العربه قلتله انتوا جيتوا الزبير ايام الحرب الايرانيه والحين خلصت الحرب ليش ما ترجعون لبيوتكم بدل ما انتوا عايشين بزبير اجار قاله والله مااترك هذي الارض ابد هذي ارض مرزوقه والخير فيها مبروك ، وهذا من الاسباب الي خلت الناس يتوافدون على الزبير .smil60

طيب قول شكنا بزبير اخر ايامنا وشصرنا الحين اقصد من كلامي ان الزمن او الواقع هو الي يفرض على الشباب هذي الاخلاقيات وصدقني الفطره السليمه لها دور كبير وانشاءالله ربنا الي انتشلنا من ذاك المستنقع الى غرقنا فيه حتى تدنت الاخلاقيات وصارو الاخوان يقعدون سوى ، قادر انه يحفظ شبابنا بهزه بسيطه تعيد لهم رشدهم

ارجوا ان لا يفهم من كلامي اني اقول دعو الخلق للخالق وانتظروا الفرج ، ولكن انا اشوف ان حال بعض الشباب يصعب معه وهذا الحال تقويمهم ، لكن الظروف وحدها هي الي قادره ان تغير مفاهيمهم

والله الهادي الى سواء السبيل

يا أخي الفاضل ..

لم هذا التحامل على هؤلاء الشباب ، لم نحن نُقارن بين جيلنا وجيلهم ؟
ونُصور أنفسنا بزخم أعمال جيلنا بأننا أفضل منهم ..
ترى حتى آبائكم كانوا يُعانون من نفس المشكلة التي تُعانون منها الأن ..

أخي الفاضل ..

قل لصاحبك ، لو سمحت هدئ من روعك ، إنها فترة مراهقة ، وأنها فترة
إجبارية لا إختيار فيها .. smil103
ربما تقصر أو تطول ، ودع إبنك يستمتع بهذه المرحلة ، وحاول أن تتعايش
أنت معها ، وتتأقلم في عقر دارها ..
وهذا لا يعني أبداً بترك الحبل على القارب ، وتركه يفعل ما يشاء ..

لا تشددوا على أبنائكم ، إنهم فلذات أكبادكم ، إنظر من حولك وسوف تجد
أن أبنك بخير وعافية .. فتحمد الله كثيرا وكثيراً
لا تطلب الكمال ، إقتنع بالشيء البسيط الدائم ..
قف مع نفسك وتذكر يوم كنت شاباً ماذا فعلت ؟
هل كان ترتيبك الأول في الدراسة ؟
هل طلقت رفاقك وآقرانك ؟
هل سمعت كلام أبيك في الصغيرة والكبيرة ؟
كم يوم عاندته ووقفت أمامه في آراءه وطلباته ؟
كم مرة قال لك في وجهك ..
الله يهديك
الله يصلحك
الله يحفظك .. ؟
لمَ لا نذكر ، لمَ نحاول أن نضع تجارب السنين الطويلة في عمر شاب لم يفقه
الحياة كما يفقهها أنت وأنا .. ؟

وأخيراً قل لصاحبك ..
قم بزيارة للمستشفيات ، وإنظر للحوادث
قم بزيارة للسجون ، وآسأل عن القضايا
قم .. قم .. قم .. كي تعرف فضل الله عليك وعلى إبنك ..
ضع يدك بيد إبنك ، وقاسمه شراكة مصاعب الحياة
بالرغم من أنه لا يرضاك شريكاً أبداً ، ولكن أقبلها أنت من طرف واحد ..

إعلانها شركة مقفلة من شريك واحد فقط ، والعائد منها مقسوماً على أثنين ..
وإدع الله لنا وله بالهداية ولا تيأس .. وتحسس مواطن رغباته وسيلان لعابه ..

وأخيراً يا المربد ..
تراك أذيتنا بالأولاد ، ما عندك شغل غير الأولاد .. الأولاد ..
يبه .. تكلم عن البنيات ، إعدل في المشاركات ( فلا تميلوا كل الميل .. )
أكتب مرة عن هلنقه ومرة أخرى عن هلنقه ..

اشكرك اخي الساهر على مشاطرتنا الافكار واسال الله ان يصلح لك الذرية ويرزقك برهم.

والحل الذي ذكرته من انجع الحلول وهو مصادقة الأب لإبنه الشاب. وممارسة نفس الهوايات.
ولكن تبقى مشكلة عند بعض الاباء وهي وين يلقى الاب الوقت علشان يمارس الهوايات مع ولده؟

سعدت بردك أولا لا يوجد عذر للأب أذا اراد تربية أولاده تربية يرضى الله عنها بأذنه تعالى تخصيص وقت كافي لهم صدقا كلمة جميلة من الوالد تكفي لتربية الولد لسنوات.

اخي البيق
اشكرك على مرورك ومشاركتك ، فعلا المجتمع والبيئة لها اثر كبير ، وهل هذا مبرر لتجاوزات الشباب ؟

آمل ان تفيدنا بارك الله بجهودك .فانت معلمنا الاول ولا باس من الاستعانة بصديق

استاذنا القلم التراثي وانت ايضا مشكور على مشاركتك وتوجيهك ، واعجبني سؤالك:

قف مع نفسك وتذكر يوم كنت شاباً ماذا فعلت ؟

اما صاحبي ابو عبد الرحمن فما اعرف عن شبابه واما انا فكنت مسكين ما اطلع من البيت الا مشاور الوالده وتسمح لي عند عتبة الباب فقط.

حتى مرة عاندتها ورحت عند البقشة اصيد طيور بالنباطة وانقصت رجلي بقاعدة بطل وجيت للبيت دمي يصب نزيف وحطيت عليها قاز ونمت من المغرب.

اشكرك اخي الكريم على توجيهك للموضوع وفعلا ينبغي المحافظة على شعرة معاوية مع المراهق.

الله يا المربد الزمان تغير كنا في السابق نقول الي اهلنا والله والله أطلع عند عتبت الباب، شوف الزمان شلون تغير الوقت الحالي معظم الوقت الأولاد محبوسين في البيت وفجاة تلاقيهم 6 سنوات في المدرسه عالم ثاني بالنسبة لهم . وتعليم آخر بالنسبة لهم ممكن يكون تعليم شله فاسدة وممكن ثلة من علماء المستقبل

أخونا ابو عبدالرحمن يسلم عليكم ويشكركم جزيل الشكر على ما ابديتموه
وسالته ليش ما تكتب انت ؟
قال ما احب المنتديات عموما ولكن يمكن بالمستقبل اسجل عندكم.
وانا بدوري اشكر من ساهم في هذا الموضوع ودمتم.