كون الموضوع ساخر راح اتكلم بالعامي
لكن يبقى له هدف تستخلصونه في نهاية الموضوع ان شاء الله
بداية..أنا اشتغل ( اشتغل ؟..بناي شنو تلقى الحين اللي يقرا الموضوع يقول الحمد لله ولدي مو عندك ) بالتعليم وادرس مرحله اوليه ولي سنوات ادرس الصف الثاني
يعني اولاد اعمارهم مابين الثمان والتسع سنواتsmil80

تتميز المرحله العمريه هذي بحب سرد كل شي يصير خلال اليوم ( يعني هذره ) وكثير من الاحيان يصير فيها نوع من المبالغه بالسرد ( قيوره ) لجذب الانتباه
ولو تسألوني شنو اسوأ يوم لك بالاسبوع ..راح اقولكم بدون تردد يوم السبت
لان كل واحد من الطلاب بيشغلني بشي صار له خلال نهاية الاسبوع
ومن واجبي كمعلم ومربي لهذا الطفل اني اصغيله واوجهه
لكن اذا كان عندك 25 ياهل وماشاء الله اغلبهم قرايب أو جيران
وجماعه وحده ويعرفون انك خوي ابوهم..smil110..تلقاه اول مايقبل عليك الصبح
يقولك تدري ابوي شيقول امس :confused: طبعا عندك حلين اما انك ترد عليه وتقوله شيقول ؟
او انك تلبسه وجنك ماسمعت...تهقون يفيد الحل الثاني ؟:mad:
مستحيل لان الولد راح يقول اللي بخاطره رديت والا مارديت:D
طبعا من بداية السنه وحنا انبه عليهم مو كل شي ينقال بالمدرسه:mad:
ونقصد بالذات الامور الداخليه لكن البعض لسانه فالت smil72 وعسى مايشوف شي
الا ركضه يسولف لرربعه ولاتنسون اني علمتكم من البدايه انهم اغلبهم اما اقارب او جيران
يعني الخبر اذا طش بين الطلاب بالمدرسه الصبح الله وكيلكم عقب المغرب التلفونات تشتغلsudilol.gi

( الله يستر على الجميع )

الهدف من الموضع يا أخوان
أن ينتبه الابوين والكبار الموجودين بالبيت لجميع تصرفاتهم وأقوالهم
أمام ابنائهم وأخوانهم لانهم فعلا وكالات انباء سريعه
( على ايامنا جنّا اذا بغينا نهبل واحد نقوله شسم أمك ):p
ولكم كل الشكر والتقديرsmil58

السلام عليكم

أنا سعيد بوجود مربٍ مثلك معنا هنا ، فأنت وأمثالك هم من نتطلع إلى
الكثير من الخبرة التربوية من ورائهم ..
قدمت لنا وجهآ ربما عايشناه لكن لسنا بالضرورة منتبهين له ...
الله يأخذ بأيدينا وأيديكم لبناء جيل عليه مسؤوليات غاية في الجسامة
والتحدي ، والله المستعان في كل شأن وعلى كل حال سبحانه .
بارك الله فيك وأسعدك في الدارين .

الله يعينك اخوي تراوبي.
وانت على جبهة ماهي سهلة ولكن عليك بالصبر وطولة البال .

صغار نربيهم بمثل عقولهم ... ونبنيهموا لكننا نـتهدم
كدولاب دائر حول نفسه .... يطول به المسعى ولا يتقدم

وقديما قيل: اخذ علوم القوم من سفهاها

فلو عرف الكبار معنى هالمثل كان عرفوا كيف يجب عليهم ان يصيرون قدوة بتصرفاتهم واقوالهم امام صغارهم.

اشكرك على هالمشاركة وبانتظار توجيهات اخرى بس لاتبطي...

تحياتي

الأخ/ تراوبي في أمور لا مفر منها، في الخارج المدرس مهنة لو بالغت شوي تعادل وزير وهذا لما يكنون له من تقدير وأحترام لأنهم يعرفون آباء الطلبة ان المدرسة هي المربي الأول لشخصية الطفل. بما أنكم مربي أجيال لماذا الطفل لا يعطى مطلق الحرية بالتعبير عن نفسة لكن في أطار جميل ليعرف يفرق بين الأمور الشخصية والأمور العامة، وهذا يعطيه قوة الشخصية والأرتجال في الحديث مستقبلا.

هذا والرسول صلى الله عليه وسلم يقول: {. . وما كان الرفق في شيء إلا زانه , وما نزع من شيء إلا شانه }


والسلام ختام

السلام عليكم

من ينتبه لمثل هالامور ومثل هالتوجيهات من مربي قاعد مع الولد من الصبح للظهر ؟
تصدق نبهتني لامور كنت غافل عنها وفتحت عيني لاشياء ما كنت شايفها ؟
مشكور يا تراوبي

أخي الفاضل عبداللطيف
أنا سعيد جداً بانتمائي لأسرة هذا المنتدى
ومصدر سعادتي هو أنتم ... جميل أن يهب لك الله إخوان مثلكم
لك خالص تحياتي أخي الفاضل
أخي الفاضل المربد
لاشك انها مسئولية عظيمه..والله يعين على تحملها وأرجوا أن اكون كفؤاً لهذه المسئولية
لك كل الشكر والتقدير أخي العزيز
أخي العزيز ساهر
لاشك أبدا في كلامك ومتى ما أستشعر المربي عِظم هذه المسئولية أمام الله فلا تَخف أبداً
ألف شكر لك أخي ساهر
أخي الكريم هـ . م . س
العفو أخي العزيز وأنا حبيت أطرح الموضوع للتنبيه
مشكور على تفاعلك أخي هـ . م . س

يا جماعة ..

إفسحوا الطريق لهذا المربي ، ودعونا نستمتع وننهل من خبراته وتجاربه
أخي العزيز ,,
كم رائع منك هذه الوقفة الجادة ، وهذا الضوء المسلط على مثل هذه المرحلة
التي يغفل عنها الكثير والكثير ..
بسبب ظروف زحمة الحياة ..
بسبب ظروف وخر عن دربي أنا عندي شغل ومشغووووووووول .. :o
كم واحد منا لا يعلم عن حياة أبناءه شيئاً خارج البيت ولا حول ولا قوة إلاّ بالله ..

أخي العزيز تراوبي ..

لقد آثرت المشكلة بدرجة عشرة على عشرة بمقياش رختر
هذه المشكلة التي تعيشها في يومك التعليمي وعرضتها ، بصورة المربي
الغيور على أبناء وطنه وأبناء أمته ..
ولكن .. هل هنالك من حل لمثل هذه الأنباء المهربة أو المتسربة ؟
هل هنالك أدوية وطب لها ، يمكن علاجها ؟
نحن ننتظر رأيك ..

تراوبى الطعم اللى ما ينشبع منه
اشوف اخبارنا طاشة ( قبل )
عندى بدير الله يحفظه هذره
يقول عمه ( من الدمام الى الكويت ) بدير ماسكت
قلت ليش تاخذه وياك ؟,,, قال عمه ابيه ايوسع صدري انا بروحى....
اتلاتها سيده للطبيب قلب راسى

تخيلت قلم التراثي كنه سواق عربانة أم حصان دازه وسط سوق الجت بعز الضحى وشايل معاه تراوبي وهو يقول: يا جماعة أفسحوا الطريق لهذا المربي تعليق : 6. يا خوي لا تصيح ولا ترفع الصوت .. الموضوع الجيد يفرض نفسه. وبالنسبة لك يا تراوبي الحين ما لقيت إلا هالاسم الله يبارك فيك. يا خوي نقرا موضوعك ونتلمض، ما ندري نركز على الموضوع ولا التراوبي. ترا عليك حق تدبرلنا تراوبي بما أنك ذكرتنا فيه، مالنا شغل.
أشكرك أخي تراوبي على الموضوع الجيد والجديد والمفيد. وفعلاً نحن بحاجة لأن نشارك جميعاً بتجاربنا وخبراتنا لفائدة الكل. وبانتظار المزيد منك.
تحياتي وتقديري ...

تراوبينااااااا ..
عن إذنك وخشمك ودي أكلم مسلم أون لاين

يعني إلي يسمعك يقول يعرف طول وعرض سوق الجت ؟
أو مقطع رجوله مشي فيه .. ؟

بس أقول :
الله يعافي شياب المنتدى إلي علموك عربانه أم حصان ..
ولا أنت ورأس البر حقين سيارات ودبابات .. تعليق : 5

أخوك / القلم

و لو أني حضرت متآخرا
أخي الفاضل تراوبي أشكرك من صميم أعماق القلب الممتن لشخصكم المبجل على هذا الموضوع الحي و الذي يخصنا بالذات نحن أولياء الأمور و الذي أغلبنا لا يملك النفس الطويل أو البال الوسيع لهذرة الطفل و هذا مجرد رأي شخصي عندما أقل : أغلبنا".

تراوبي أسم على مسمى يمتعك بلذة طعمه و عسى قامتك يا أخي لا تكون مثل قامة القنينه لآنها شكلها مضحك قليلا مع أحترامي للتسمية والذي ندعوه بالعاميه " مدلكم" ولو أني أفضل شراب النامليت يدعى " السيفون أبو تبدوره" وارد العثمان ترى الشياب فقط لاحقين عليه.
وكما أشتكى عم بدر من هذرة أبن أخيه فأنا والله أقاسي من هذرة أبنتي " أستبرق" و ندعوها " بروقه" أما الوالدة عسى الله أن يلطف بمعاناتها تدعوها " براغ" طبعا ليست عاصمة التشيك و انما تقصد بها " الدولمه".
و نعود ألي أستبرق و مدى قابليتها على الكلام و يمكن أن أصور لك الموقف بما يلي:
تصور أنك أحضرت 10 تلفزيونات و ثبت محاطها جميعا على نشرات الأخبار الرئيسية التفصيلية في آن واحد. فهل تستطيع أن تصغي لمحطة ما؟
سوف يتغازل بؤبؤ عينيك و تنكتم طبلة أذنيك و يختلط معا مخ و مخيخ دماغك و تزداد نبضات قلبك و قد تصل الى 200 و يحمر وجهك من شدة قابليتها على الكلام و مع هذا يا ويلك أذا لم تصغي أليها وجها لوجه.
اللهم أحفظ أبنيتي من العين آمين و أبنائكم .
أخوكم/ طلحه

قلم التراثي
أشكرك جدا اخي على كلامك الجميل والذي بلا شك لا استحق الا جزء يسير منه
بالنسبة للحل سوف ادرجه ان شاء الله بموضوع قادم يحتوي على عدد من الوقفات
الف شكر لك أخوي

أبو بدر
ربي يخليلك بدير وأخوانه ويجعلهم قرة عين لك (فصلنا صاير مركز اعلامي لبدير وربعه )
لك تحياتي أخوي أبو بدر

مسلم أون لاين
لاشك ان تبادل الخبرات هو نوع من تعميم الفائده على الجميع
( من قلت انتلمض ذكرتني باللمندوزي والا نسيتوه ؟ )

أخوي طلحه
ربي يحفظلك بنيتك وعيال المسلمين جميع وأولهم من يقرا
يخوي خوفتني من قلت( مدلكم) وانا اتلفت اقول وين شافني
مشكور اخوي على ردك الممتع

الحين انتوا تركتوا موضوع الريال واشتغلتوا باسمه

موضوع هشكل مهم ما يصير يهمش بهالطريقه ، صج التروابي طيب لكن على الاقل جاملو الريال شويه وبعدين احجو عن اسمه

انا ابي اذكر حادثه تأكيدن على موضوع الاستاد تراوبي

مره ولدي الصغير سباهي وهو بالروضه راحت امه تزوره وسألت عنه الابله كاظميه ، قالت كاظميه ان الولد يومين يسولف عن اخوانه عنتر وعبله وشجارهم اليومي وهو متأثر بافلام الكرتون يقوم ويقول لأقرانه يعني يوزع الادوار انت فريد شوقي وانا رشدي اباضه وهشكل ، المعني انا قلت لآم عنتر يعني الولد يقص قصص كثيره للابله وهذي منها ، وبعدين الابله عرفت ان حنا التلفزيون عندنا بالبيت كله جيجو ماجوج

طيب شسوي برايك ما هي احسن الحلول انا خايف يوم من الايام ينقل لهم بث مباشر بجميع الاحداث البيتيه

معلومه : التراوبي شراب عراقي وهو يعتبر محاوله مثل ما حدث الان بالنسنه لمكه كولا وزمزم كولا لمنافسه المرطبات الامريكيه ، وقد نجحت الفكره فقد انتجت الشركه نوعين نوع طيب جدن وهو الي يقولون عليه الشباب المدلقم ولكن ما شبعنا منه لأن قيمته 35 فلس وهو طعمه قريب من الشاني والنوع الثاني فشل طعمه مثل سينالكو الليمون وقيمته 10 فلوس

اخوي العزيز تراوبي اقول ماتعطي دروس خصوصيه بالتقسيط اعتقد هذا الطلب نعقول

موضوع رائع من مربي فاضل ... فشكراً لك أخيي تراوبي على هذا التنبيه وهذه الخبرات والتي بودنا الاستفادة منها وسردها في مواضيع كثيرة من خلال تجاربك مع الأطفال الصغار ... لكن هناك مشكلة غير التي ذكرت وهي ماذا تقعل مع كبار السن إذا كانوا بنفس طبع الصغار ...

ابو بدر يخليلك أوليدك بدير قل آمين ... لكن المشكلة صارت لي مع خالي .. جيت وياه من الكويت إلى الرياض ... والله لا يعودها من جية .. قلب رأسي قلب ... هو من النوع اللي يحافظ على السيارة ماشاءالله عليه ... وتوه منجد السيارة بالكويت ومركب بلاستيك بالأرضية ... ومن طلعنا من بيت عمتي وعينك ما تشوف إلا النور تبيه يسكت ... تبيه يهيع شوي ماكو فايدة ... بغيت أيدع نفسي من السيارة ... كل سوالفه عن التنجيد .. وعقب كل سالفة أو سالفتين صب شاي صب ماي ... وأنا هذي شغلتي صرت جني مهدلي ... ولا وأزيدك من البيت شعر ... يمشي 100 بس يعني زود أزعاج لأن الطريق راح يطول ... ومن عقبها حرمت أركب معاه داخل الديرة مو بس بالسفر ...

شفيك أخيي قلم التراثي على ولدنا مسلم أون لاين خله لحاله ... وإذا ما سكت ترى أقول لأخواني الكبار المربد أو طلحة يشوفلهم صرفة وياك ... شفتنا صغار قمت تأخذ راحتك ...

أخيي تراوبي أتمنى مرة أخرى أن نستفاد من خبراتك الجميلة من خلال تربية الأجيال ... والله يعينك .. لأنه بصراحة تدريس المراحل الأولية تدوخ الرأس ... الله يعطيك ألف عافية أخيي ... على فكرة أسمك عاجبني مرة ...

تراوبي ..

ألا ترى معي نحن الأباء ، إبتلش فينا الأبناء ؟
إذا ما تكلموا ، قلنا عنهم معقدين وبحاجة لعلاج ..
وقلنا له ليش فلان سألك ولم ترد عليه ..
وإذا تكلموا ، دخلوا معنا في محاكم تفتيشية لبعض الكلمات ..

ألا يوجد لنا نحن علاج ؟