بيت العمر أصبح هاجس كل شخص منا، والحياة أولويات الأولوية الأولى النجاح في الدراسة وهذا هم، الأولوية الثانية البحث على وظيفة، الأولوية الثالثة الزواج لأكمال نصف الدين، والأولوية الرابعه المنزل، لكن الأولويات الثلاث الأولى تتحقق بدون أن نلاحظ بحكم الأنسان في قمة عطائه، لكن الرابعه آه وألف آه تصبح هاجس يومي وهم، تحاول أن توفر لا تقدر تحاول أن تقلص نظرتك من فيلا ثم الي بيت متواضع ثم الي شقة فخمة الي شقه مع أهل الشام ثم شقة مع الآسيويين تحديدا مع بهنود، وأتمنى أن لا تصل الي صندوق.

لماذا لانجعل هذا الموضوع محط أنظارنا لنضع آلية أو طريقة لإيجاد حل جذري من خلال عمل عاصفة من الأفكار. أملي المشاركة وأنا أعاني من هذا الهاجس وكثير غيري.


طلحة الموضوع مو منقول

أخي الكبير ساهر ..

صدقني الأولويات لا تنتهي أبداً ..
وبقدرة قادر كل ثانويه ، تقفز وتصير لها أولوية ..
يقول أخواني الذين هم أكبر مني بسنين :
بكرى بعد البيت يجيلك العيال ..
واحد يريد غرفة نوم تطل على شارعين
وثاني يريد سيارة جديدة ، ربعه مو أحسن منه
وأم العيال والبنات يبون سواق ، علشان عزيز معيي يوصلهم ..
وأنت يا المسكين شتلحق عليه ..
حتى هم يسدون نفسك عن الزواج من ثانية ..:mad:الحمد لله بعدنا ما وصل لمثل هذا العمر ..

بعد ماكتبت الموضوع أعلاه دخلت على محرك البحث قوقل وكتبت بالعربي مشكلة البيت ياريت تجرب فتحت حتى الآن 9 صفحات كلها تتداول نفس المشكلة، هذا معناه موضوع يستحق إيجاد حل له.

عندي موظف متزوج وعياله بالجامعة علشان تعرفون انه انسان عاقل.

هذا الموظف باني له بيت وساكن فيه.

الحين بدا يطقطق بالاعمال الحرة ، تصدقون انه يفكر يبيع البيت ويستثمر امواله؟
يقول انا مجنون رابط لي مليون ريال علشان ما ادفع اجار خمسين الف بالسنة؟
وهو الان عارض بيته للبيع على ان ينقل اهله الى احسن فله بالمنطقة ويقول ما يتجاوز اجارها خمسين الف.
أظن ان مشكلة امتلاك البيت هذي عقدة قديمة عندنا، لكنها لو فكرنا فيها ما لقيناها حقيقة ضرورة من ضرورات الحياة.

علشان عيالك !!!

طيب الاستثمار ايضا علشان عيالي. ليه ما استثمر سعر الارض واستفيد منه ويمكن هالاستثمار يجيب لي اكثر من البيت نفسه.

مجرد راي.

أخي المربد ..

بعد إذن الغالي ساهررررررررررر ..

صدقت ونعم الرأي ونعم التفكير ..
الواحد يعيش في سلف طول حياته كي يبني بيت
ويسكن فيه إعياله .. ويظل طول حياته في تقشف وحسرة
لم هذا التفكير ، ولم تحمل أوزاراً غير أوزارك ؟

البيت وما أدراك ماالبيت ... هاجس الكثير ... لكن الشكوى لله .... وعلى فكرة عندي بنامج ميزانية على الاكسل راح أحطه هنيه ... يمكن يستفاد منه أخيي المربد ...

من رخصة الجماعه بعد السلام
كنا أول نحلم نكمل الدراسه..... وكملناها
و حلمنا بعدين نلاقى وظيفه...... و لقيناها
و حلمنا بشراء السيارة...... و شريناها
و حلمنا نلقى بنية الحلال ..... و توزوجناها
و قلنا يا االله ترزقنا ذريه..... وجانا نصف درزن غاثينا
و حلمنا ببيت صغيرون ..... و أكبر فله بنيناها
وحلمنا يصير عندنا جم فليس.... الحمدلله الحساب مكفينا
و لا نزال نحلم بالجنه..... يارب من النار تنجينا

ليه الناس حريصه على السكن وبناء المنزل ؟
أليس التعليم اهم من السكن ؟
ليه ما نحرص على التعليم أكثر من الحرص على السكن ؟
ليه اولادنا وبناتنا ما يتعلمون لغة وكمبيوتر في اوقات الفراع ؟
ليه تفكيرنا فقط بتحويش الفلوس لنبي بيت او فله وننسى بناء العقل ؟
ماادري لعلي اجد جواب مقنع عندك يا saher00

مع الأسف كل اللي يقولون امتلاك البيت شيء غير مهم .. أعتقد انهم ساكنين في بيوت ملك !! يا إخوان الدين النصيحة.
وبالنسبة للعزيز (ة) هـ م س وش اللي يمنع من وجود السكن المستقر (الملك) + تربية العقل لدى الأجيال. ما أعتقد فيه تعارض بين المسألتين، مع اتفاقي معك بأن التعليم وبناء العقل من الأمور الهامة جداً.
يا اخوان بيت الملك شئ ضروري لاستقرار الأسرة النفسي، والمادي والاجتماعي. والا عاجبكم المناقز بين بيوت الأجار. واحد يقولك اطلع أبسكن ولدي والثاني يقولك أبزود عليك عاجبك ولا ورنا عرض أكتافك. ومن بيت أجار لبيت ثاني الواحد كنه لاجئ بديرته.
على أي حال أخوي العزيز ساهر، موضوع البيت الملك مو سهل وأيضاً مو مستحيل. لكن يبيله صبر وتخطيط وإصرار وتوفير مادي، وقبل كل شي التوفيق من الله..
بالنسبة لي أخوي أنا حليت مشكلتي مع بيت الملك كما يلي:
كان عندي أرض ومقدم عليها قرض من سنوات، ويبيلها سنين طويلة على ما يوصل سرا القرض. المهم اني لقيت ثمنها زاد بمقدار 85 % عن السعر اللي شريتها فيه. بعتها بمبلغ محترم ودفعت بجزء من الثمن مقدم لبيت ملك وبجزء فرشت البيت والجزء الأكبر استثمرته. والحمدالله عائد الاستثمار يساعد في دفع القسط الشهري ويزود منه والحال مستورة والحمدالله.
فاللي أشوفه انك تحاول تشتري ارض في موقع مقدور عليه وله مستقبل حتى لو بالتقسيط أو بالسلف، وخلال سنوات قليلة بتلقى قيمتها زادت + انك تكون سددت ما عليك من سلفة لو كنت تسلفت. فيا اما انك تبيعها وتزود عليها وتشتري بيت جاهز، أو انك تبتدي العمار خطوة خطوة وبحسب التسهيل وتوفر السيولة، ومع الوقت بتلقى البيت العامر قام وتوجه.
هذي تجربتي العملية لحل مشكلة بيت العمر والله يوفقك لكل خير ويسهل عليك ويباركلك في عيالك ومالك ... وجميع المسلمين ...

هـ م س لو تلاحظ ذكرت الأولويات الدراسة ثم الوظيفة ثم الزواج

يعني أنا ذكرت الدراسة هي الأولي وهذا لايوجد أحد منا هو بداء بتعليم نفسه طبعا الأهل حرصوا على تعليمة وهذا دور كل أب أو أم أعتقد التعليم مهم جدا وكل واحد يصارع يومه ليقدم أفضل تربية وتعليم للأولاده أتمنى أن أكون وفيت.


مسلم أون لاين تجربتك أن دلت فتدل على سعة الفكر والبصيرة وأشكرك من كل قلبي. حل ممكن تحقيقة.

الأخ مسلم اون لاين (شطول اسمه)
اسالك سؤال : كم يسوى بيتك الآن ؟
تصور لو انك استثمرت قيمة بيتك في اسهم مثل الاتصالات كان 200 ريال قبل سنة بالضبط والآن 500 ريال !!!

أؤيد المربد في تخطيطه ... واللي أعرفهم واجد ... استفادوا من هذه الفكرة ...

أخي الغالي المربد، لا حرمنا الله من طلتك البهية، خلينا نتكلم بشكل عملي. بما أنك تقول ان الاستثمار أهم من امتلاك منزل، فهل بعت منزلك لتستثمر ثمنه في الأسهم ؟
ولو قرأت تعليقي أعلاه لرأيت أني لا أعارض استثمار المال في الأسهم أو غيرها، وأنا أقوم بذلك بالفعل، ولكن أقول لا لأن يكون استثمارك لأموالك على حساب استقرار وراحة أهل بيتك، فهذا بالنسبة لي، أهم من جميع أموال الدنيا. ثم لا تنس نقطة هامة. هل كل الناس مهيئون لموضوع التجارة والاستثمار. فأرجو منك عدم تصوير الموضوع كأنه ربح دائم. فمثل ما فيه من أرباح ففيه خسائر لايعلم مداها إلا الله. فماهو ذنب من يسمع نصيحتك ثم لا يوفقه الله بالربح، فلا بيتاً امتلك ولا رأس مال أبقى.
الزبدة أنا لا زلت أؤكد على أن امتلاك بيت العمر يأتي في المقام الأول ثم يليه موضوع التجارة والاستثمار. وأنا أحترم وجهة نظر كل من يخالفني لو كان طبقها على نفسه أولا. أما نتكلم بكلام بدون تطبيق فاسمحلي ....