يوم من الايام زارني صديق، وهو من الناس اللي أغليهم، ودخلنا بالمجلس قال لي طف المكيف ماله داعي الجو زين وانا علي اثار قل صح، قلت له ابشر.
قامت ام جواد وما قصرت نادت على الولد وقالت له ابوك عنده رجال، وطبخت لنا القهوة عاد هي خوش تسوي قهوة اذا صار لها واهس، ولو احيانا تجيك قهوتها كانها غسال فناجيل. وحطت معها شغل العجين اللي يقطر من الزعفران ودك بس تناظره كانه اصابع عروس. وعبأة لنا جك ماء وحطت فيه من ماء اللقاح عندنا توه جاي من البحرين جايبة صديق لي يشتغل هناك وجاب لنا بطل مرقدوش وبطل لقاح، بس لقاح من الزين يقول جايبه من المصنع اول طبخة اذا فتحت البطل تشم ريحته وانت هناك.

الولد الله يسلمه راح ونزع الثوب المغربي تخبرون الشباب يحبون يلبسون هالثياب اللي لها قبع من ورا مثل قبع (روبن هود) ولبس له ثوب نظيف ومكوي كان لابسه بالعيد وتوسخ وغسلوه له، وعلشان انه جديد ما رضا يكويه بالبيت قام واخذه للكواي. ولبس طاقية العيد المشخله وفرحان فيها اول مرة يلبس طاقية مشخلة، ولبس شماغ البسام شرينا انا وياه نص كورجة من سوق الديرة.

جاء الولد وسلم على الرجال، قلت له هذا الولد، قال ماشاء الله صار طولي، وراح وجاب لنا الماء والقهوة وشغل العجين عاد خويي هذا يحب شغل العجين، صب لنا كل واحد فنجال قلت له خلاص ولدي اترك الدلة ورح شف شغلك.

راح الولد كان يسألني صديقي من تحب اكثر هذا والا اخوه اللي اصغر منه؟
قلت له ليش السؤال ؟
قال لأن ولدي اليوم سالني من تحب اكثر انا والا اخوي؟ يقول واحترت شلون اجاوبه وهالحين ذكرت هالسؤال وقلت ابي استشيرك.
ويــــــــــــــــــــــــــــــه يا بو .احمد هذا سوال يـبـيــله اجابة طويلة، قال ميخالف اليوم ما ورانا شيء بس خلنا نستفيد من هالقعدة.
انا عندي مكـيــتـبه يعني شوي كتب بالمجلس اغلبهن هدايا من الحبايب يجيبون لي القلم التراثي وغيره، قمت وجمعت لي كم كتاب وجبتهم عندنا على الطاولة علشان اذا صار شيء ما اقطع سالفتي وياه واقوم ادور كل ساع.

ويـــــــــــه صار الموضوع طويل ، وبعض الناس مهاوشيني عن طول المواضيع ...

بس وسعوا صدركم،،،
او تدرون شلون ؟ اكمل لكم بعدين احسن.

يا حبك لدبلة الجبد الحين كل واحد منا مبزر عويناته على الآخر يم الشاشه نتابع هالمقال الحليو و القصه اللطيفه تقوم بالتالي الله يهديك تسويها مسلسل من حلقات عطنا الزبدة ولا تطول علينا يا معود .
أخوك/طلحه

وبعدين وياك ... كل يوم ترفع عندي الضغط والسكر ... حرام عليك يا أخي ... تشوقنا وبعدين توقف ... الله يصبرنا أنا وأخيي طلحة ... يالله كمل بسرعة .... الله يخليك ... تكفى ... أرجوك ... الله يخليلك أم جواد ... الله يخليلك عيالك ... ويه يعل عمرك عمر شعيب النبي ... يعلي ماذوق حرتك .... قول آمين ... أيه يالله كمل وبعدين وياك .... أخيي طلحة ترى حنا معزومين عند المربد لاتنسى ...

الله يحييكم انت ومن يعز عليكم بهالمنتدى الا بعض الناس ثقال الطينة لا يجون معكم
وترى انا ما احب اطول السالفة ولكن الشكوى لله تعبت من الطباعة.
واليكم البقية:



تناوشت لي اصبع من اصابع العروس اللي قدامي وصبيت لخويي فنجال قهوة
قلت له يا بو احمد انا ادري شلون كان شعورك اول ما جاك هالسؤال

لأني اعرفك حريص على انك تبذل لعيالك كل انواع الاهتمام والحب
ولكن تصدق؟
ما فيه اي طريقة تقدر تقنعهم انك ما تفرق بينهم.

رشف له رشفه من القهوة وتناوش له اصبع من شغل العجين اللي يا حجي يذوب في فمك لا في يدك !!!
قلت له لكن راجع حساباتك وشف شلون تعاملك معهم من عدة نواحي،
اما الحب فاظن انك تحتاج انك توزعه عليهم بالتساوي، وتتاكد انك موزعة بالتساوي، ويكون حب حقيقي ماهو تمثيل مثل الافلام المصرية البايخة. نعم حب لذواتهم على انهم عيالك ثم تتدخل لمساعدتهم على ان يلاحظون انهم مهما قصروا ومهما كانت وكاحتهم الا انهم عيالك وانك تحبهم.

نشف ريقي صبيت لي نص كلاص ماي ملقــّح، وتـنـاوشــت لي اصبع من شغل العجين اللي ما تخليني ام جواد اشوف وين موزيته عني حتى ما اسمن.

ثم بعد المحبة راقب اهتمامك هل انت تهتم فيهم بالتساوي واهم من هذا انك تعلمهم انهم يطلبون الاهتمام اذا احتاجوه وانهم يتبادلونه بيناتهم.

يا حجي ابو احمد نزع نعاله وسفط رجله على الكنبة ورفع الثانية يعني قعد لي ركبة، وتوه يبي يسأل قلت له اصبر خلني اخلص.

ثم بعد الحب والاهتمام راقب المشاعر واقصد فيها مشاعرك تجاههم ومشاعرهم تجاه بعض فالمفروض انك ما تزرع التنافس بينهم ولكن انك تعلمهم معاونة ومشاركة بعضهم بعض، واهم من هذا هو تعويدهم على التعبير عن مشاعرهم وان كانت تعتبر ماهي زينة واحرص على ان يكون تعبيرهم بالكلمات وليس بالافعال.
طبعا التنافس بيصير بك وبلياك ولكن دورك هو لاتقارن بينهم حتى تقلل التنافس بينهم ... بل حتى في العقوبة لازم تكون منصف وتعاقبهم بالتساوي يعني نفس العقاب وفي نفس الوقت

قام ابو احمد على طوله وصب له كاس ماي وشربه ثم لبس نعاله وعدل مرزام الغترة وواسا العقال وقال لي قلبت راسي حيل حيل بس عطني وقت افكر واجرّب

قلت له الموضوع طويل لكن خلني اعلقه بالمنتدى ونشوف اخواننا اذا كان عندهم راي يفيدوننا فيه

يعني هم ذبيتها بروسنا و القصة مالتك يعني ما انتهت و فيها بقية يا صبر الصبر عليك يا المربد.
بس تبي الصج يصلح مو ضوع لمادة الأنشاء كلها عِبر و حِكم ما شاء مربي ابن مربي فاضل الله يرحمه والدك .
وبعدين جنك قاعد تسوي دعاية لأصابع العروس مالت أم جوادك و ماي اللقاح .

اخوك/طلحه

استاذ يالمربد ... كل يوم نستفاد من مقالاتك الحلوة ... فعلا مربي ... الله لا يحرمنا حكمك ومواعظك ... لكي ندرسها لأبنائنا ... وثانياً هل تعلى العين على الحاجب أخيي ... يكفي أنك قاعد تعطينا دروس ... يعني من وين أييب كلام أحسن من الكلام اللي قلته ولا عندي أي إضافة ... لكن إن عندك إضافات فزودنا بها ... خلينا نستفاد ولك الأجر .... شرايك تعزمني على شغل العجين ... ولا تقدر تعطيها أبو عبدالله يوصلها لي ما دام أنك تحشني عنده كل يوم الله يهديك ... لكن مئبولة منك ... على ئد سنك ...

السلام عليكم

أخي ( المربد ) الورد

لكل إمرئ من ميله نصيب ..
أنا أحب وأعشق في المكتوب أسلوبه أن أتفحصه وأعيش فنونه ..
الجانب التربوي الذي بحثته مع ضيفك ( أبوأحمد ) أقول فيه ما قال
الأخوان ( طلحة ) ورأس البر : مربٍ أبن مربٍ فاضل رحمه الله رحمة واسعة .
الجو الذي جعلته إطارآ لتقديم هذا الموضوع الجاد وكان له تأثير بالغ
في إبصال الفكرة وجعلنا نتابعها من أولها إلى آخرها وأثرتَ فضولنا
و( شفاحتنا) تجاهها ، هذا من إمكانتك التي تعجبني كثيرآ !! رغم أنّك
أكلت إصبع من أصابع العروس وهو غير موجود على الطاولة ( السفرة )
لا أدري كيف سقط عليك .. ولكن نتيجة لإستغراقك في مدح شغل العجين
تحول بعضه بقدرة عجيبه إلى أصابع العروس ..
المهم أسلوبك في طرح الموضوع كان ماهرآ فقد قدّمت لقطة تكاد تكون
يومية الحصول لبعضنا ولقاءً حميمآ لأخوين لديهما مسألة جادة جدآ ،
وأستطعت جعلها سلسة للغاية ..
حتى أساليب الدعاية لمنتجات أم جواد كنت فيها فنانآ منصفآ فقد
إنتقدت القهوة ومدحت شغل العجين لدرجة أن طلحة سال لعابه كما
يقولون ..
زادك الله تقى وهدى وحكمة أيها المربد العزيز

شف ..

وبدون مقدمات وبدون عزايم على شغل عجين أو أصابع عروس أو معرس ..
ولو هي على ناس وناس وحنا لنا الله ..
فيه لي صديق عزيز إسمه أبو شاكر ..
عنده ولدين ويسولف لي عن ذكرياته مع ولدينه ويقول :
أنا أعاملهم مثل العينين الي في الرأس ، ممكن أشوف فيهما وممكن أصك وحدة وأشوف بالثانية ( يعني أشغل وحدة وأريح وحدة ) ..
وشف كل واحد فيه مميزات وكل واحد منهما فيه عيوب ..
وكل واحد منهما يُكمل الآخر ، وهما عندي مثل القيد المزدوج .. sudilol.gi
يعني منه يساوي له ، ولو طرحت منه من له لصارت النتيجة صفر ..
يعني ما فيه حد أحسن من حد ..
ويقول :
هم أثنينهم لهم نفس المكانة في القلب ، ولا راجح ولا مرجوح عندي بينهما ..

فضحكت من سوالفه الله يغربل إبليسه ..
فآستغرب من ضحكي ، وقال لي ، ليه تضحك ؟

فقلت له :
هذا هو رأيك بهما ( وهو عين العقل ) ..
ولكن ..
ما هو رأيهما بك أيها الشيخ الوقووووور ؟

فقال :
رضا الأولاد غاية لا تُدرك ، المهم أنك تعمل الصح وما يرضي الله وما يرضي ضميرك والباقي يبقى مرهون بتوفيق رب العباد ..

فقلت له :
والنعم بالله .. ويخليك ربي .. :confused:

أخوي القلم
تحية لقلبك الساطع و لصدرك الواسع
أنت تتصيد الناس بألأخطاء الأملائيه و الآن صادوك الشياب و لو هو ليس بخطأ أملائي أنما خطأ مطبعي و لكنك تخطا بالعنوان ( المعلب أو الملعب) الظاهر أنت حلمان بتعليب الطماطا المقمقه .
وهذا شي لا يسكت عليه حسب قانون أبي الأسود الدولي و خالويه و نفطويه كما قيل عنهم " أياك أن تخطا بثلاثة أشياء عند السرد:
1- البسمله
2- العنوان
3- المقدمه

و عسى ما تصيدني بخطأ مما كتبت.

اخوك / طلحه

عاش طلحه .. عاش

الله أكبر .. عاد ما لقيت غير الأخطاء الإملائية ..

يبه ..

تراني متجاوز الأخطاء الإملائية عنك كثير وكثير ..

حتى يسمع كثير ..

أنا عوزك تساعدني في الأخطاء الأخرى يا شمعة المنتدى ..

الاستاذ الكريم طلحة اشكر مرورك المتكرر على موضوعي لدرجة انك استعملته ساحة مصارعة.
الاستاذ راس البر نورت الساحة بس دير بالك لا يجيك طـشار من هوشــة الجماعة
الاخ عبداللطيف سرني اعجابك بكتابتي ، وتوجيهك مطلوب
القلم ؟؟؟ بعدين بعدين

اخي القلم اي ملعب تقصد ملعب السلمانية؟
اشكرك على تعقيبك على الموضوع والمثال من ابو شاكر جدا جميل اسا ل الله ان يحفظ لك عينيك ويصلحهما