الخلطة السرية لعمل التمرية


نعلم ان عمل التمريه سهل ولكن ماكل تمريه تمريه فأذا اردت أن تحصل على تمريه مميزة ومضبوطة هشة تذوب بالحلج يعني غير قاسية ولا عالوجه ولا تلصق باللهات او الضروس وكذلك يمكن تقعد عندك محفوظة لمدة طويلة وهي محافظة على قوامها وطعمها دون تغير فما عليك الا اتباع الخطوات التالية :

المقادير


1- كيلو تمر مطحون وجاهز ( يباع بالبقالات ) . لان هذا يريحك كثير من ناحية التفصم وازالة القموع .
2- ثلاث كلاصات طحين ويفضل البر .
3- ثلاث ارباع كلاص زيت خفيف مثل زيت( دوار الشمس) .
4- كلاصين حليب سائل .
5- نص كلاص رهش .
6- نص استكانه هيل مطحون .

[الطريقة
يوضع الطحين في جدر ويحمس بالنار مع التحريك الدائم حتى يصبح لونه بني وبعد ذلك قم وطمن على النار وقصرها تدريجيا وبعدها ضع الزيت على الطحين بحيث يمزج زين وبعد ذلك يضاف الحليب اليهم . (ملاحظه مهمه) هنيه يكون سر الطبخة وهو اذا اظفت الحليب مع الطحين والزيت سوف تشوف الخلطة منتفشه وهشه فاذا شفت هذي المواصفات فأن الطبخة تعتبر ناجحة مقدما ان شاء الله . بعد كل هذا ضع التمر وفوقه الهيل المطحون مع الخلطة وأضف الرهش عليهم حسب الرغبه وبداء اعبط الخليط ويمكن ازالتها عن النار مع الأستمرار بالعبط حتى تطلع لك مثل الحلاوة .
جربوها وردولي خبر وبالهناء والعافية .

عاش ولهان ..

هذي التمرية يبيلها كشته ومخيم ربيع ..
عاد يابصمان ولا بهيله ..

كلمة شـــيــفــه عند الزبيريين يعني كريه

أجل شلون نقول يعيش اخونا الشيف ولهان؟

ما شاء الله عليك يا ولهان ، الله يعين ام جوادك عليك، لأن عادة الرجال اللي يعرف يطبخ ما تصلح له كل وحده ...!!!

أخوي ولهان
وين المقادير الأتيه:
1- ماي الورد
2 -الدهن أما سمن أو ودج
3-حبة حلوه
4- لوز و جوز مطحون
5- الرهش ثقيل مو خفيف

و شكرا عيوني

ولهان اللي يتبعك يروح رجيمه من صيد أمس

صديقي ولهان

ترى خلطتك لا هي سريه ولاهم يحزنون
وترى أمي كل يومين تعملها لنا .. :eek:

كأني شميت ريحة فتنه ....لايكون واحد ذاب عزيزوه !!! ؟؟؟
مادري وش المقصود بالشيف... ـه ( لايكون كلمة شيف تعني المذكر حق الشيفه) ترى اصك المطبخ ودار الجيل وماعد فيه طبخات..
المهم حيى الله الجميع وحنا بالخدمة ...
ياخوي المربد تراك صادق بالنسبه لأم جواد الله يعينها علي تراني مهبلها على كل طبخة مرة اقول لها حطي ولاتحطين ...
اخوي طلحه هذي المقادير الي ذكرتها ممكن تظاف حسب الرغبه ولامانع من ذلك...
حيى الله اخوي الجعده نواف الله يخلي لك أميمتك وأمهات المسلمين شف يالحبيب انا قلت لك مو كل تمريه تمريه نعلم ان الجميع يعرفون يطبخون تمن ويريش ودوللومه وغيرها بس هل الكل متساوي بالجوده والطعم !!! ماعتقد ذلك فقل للحجيه تسوي هذي المواصفات وشف الفرق وماودنا نتحدى وراح تشوف الفرق،،،

كل شيء الا سـدّة دار الجـّـيل.. شلون ناكل تمر ورهش، او صبار ، او دهن وشكر، او دبس ورهش...!!!؟؟؟

حبيبي الشيف ولهان .. ما قصرت وبيض الله وجهك .. عاد تصدق اني مشتهي التمرية من زمان وما لاقي أحد يسويها لي! الحين الفضل لله ثم لك أنا أسويها بنفسي ولا المنة من أحد. شنو قاعد أسوي .. آكل حنيني من اللي يبيعونه في المحلات جاهز وأتخيل انه تمرية. ان شاء الله لما أسوي التمرية أعلمك بالنتيجة. بس الله يستر من المربد لا يجينا منه صاروخ جو أرض ... هالريال فضيحة ما ندري شنسويله .. وين نعالجه.

مرحبا فيك ياخينا ( مسلم ان لاين ) ... ارجو ان تضبط معك الخلطة وتشوف الفرق وانا الحقيقه ناوي اسوي بزنس وأبداء بأنتاج التمريه وتسويقها وابيك تشد حيلك وياي عشان نكسح السوق .... بس لألحين ماني لاكي اسم وشعار تجاري لها ؟!؟! يالله فكر بالموضوع زين اذا تبي تصير (تاير) مو المقصود بالتاير (الجرخ ) المقصود بـ (Business Man) وبالتوفيق

تامر أمر يا ولهان .. لك علي أشتري كامل أول انتاج لك وأقدمه هدية لأعضاء مرآة الزبير فقط لا غير. هذا أولاً. وثانياً لك اننا نثبت إعلان ما يخرش الميه في مرآة السوق عن إنتاجك من التمرية .. والباقي عليك .. انت ضبط التمرية وهي تسوق نفسها بنفسها. وبالنسبة للاسم التجاري .. ممكن تكتب موضوع بهالخصوص في بوابة المجالس وكل الأعضاء يساعدونك في الاختيار. هذا لو كنت جاد.
تحياتي وتقديري ...

شكرا على تحمسك للموضوع ( يامسلم أون لاين ) وعلى طاري التمريه والتسويق
ابذكر لك سالفه صارت عندنا بالعمل وهي تخص الدبس والرهش وأختصرها لك بأه كان فيه واحد من الربع ويانا بالشغل كان كل واحد من الموظفين يجيب كالعادة مع بقية الزملاء ( فطور ) الي يجيب فول او قشطة وجبن وغيرها طبعا كان معانا خواجات ( امريكان وانكليز ) المهم مره من المرات خوينا فاجاء الجميع وجاب ( دبس ورهش )!!!! وعقبها صار حديث الموظفين كله عن الدبس والرهش وعن طعمه وعن فوائده المعروفة لدى كثير من الرجال كما صورها لهم حبيبنا (رهش ) هكذا الآن يطلق عليه بالعمل حتى الخواجات يسمونه ( مستر رهش )!!!

وما اطول عليك انه الخواجات عقبها عبوا ادراجهم من الدبس والرهش وكل صبحيه تلقاهم يغطون خبزتهم بهذه الخلطة العجيبة !!!

المهم بهذه السالفه ومافيها يقولك بسب ( مستر رهش ) بدا ءت هذه الخلطة تنتشر في قارة اوربا وأمريكا ،،،

فأنا وانت ياخوي ( مسلم اون لاين ) ودنا نكتسح القارات السبع بمنتوجنا أن شاءالله فشد حيلك.

الغالي ولهان ..

إنتبه لا يسمعك ( المشرف العام للمنتدى ) .. أصووووص
وياليته هم ( بصوت واطئ ) بعد ما يقرأه .. ههههه
لأن الرهش والدبس تذكره في سوالف عتيجه .. ههههه
ولكن أنا ، غيرت مسمى الرهش وصرت أسمي الرهش ( عسل ) .. ههههه
لأن بعض المرات الواحد لا يفرق من بعيد بين الرهش والعسل ..
ولكن العسل يطير خلفه سرب من النحل ..
والرهش يحلق فوق إنائه فريق من ( ....... ) هههههه

( ياول هان ) على لهجة اهل الرمادى ـــ يعنى تعال هنا ياولد
اخوك الكبير تحمد من ابصارة وجربت بس غيرت شوي
قللت من الدهن ( لانى ما احب الدهن ) وكثرت الحليب وتمره برحى فصمتها ام جواد مالتى
وعقب ما انتهيت ذريت لوز مطحون فوقها وصارت ( علينا بالعافية )
دعينا لك ولوالديك ياولهان

أخوي ابو بدر أسعد الله صباحك

مبروك على نجاح الطبخة وكم اسعدني دعائك لي ولوالدي
وعليكم بألف عافية ..وانتظر مني ان شاءالله طبخة بسيط وسهلة وتصلح تاكلها مع التمرية!!!!

حتى التمريه صارت فيها خلطه سريه smil95
يالله هي ناقصه عن غيرها كل شيء على الموضه

أبشرك يا ابوعبدالرحمن اليوم الجمعة 18 ربيع الأول 1425 سوينا التمرية بناء على وصفتك، والمدام مبسوطة جداً :D لأنها أول مرة تضبط معاها، ومن فرحتها وزعت جزء كبير منها وما خلّت لنا إلا شوي، علشان إللي مو مصدق .. يصدق بعد الذواقة.
مشكور مرة ثانية ولا تحرمنا من طبخاتك الحلوة يا شيف (بدون تاء مربوطة) المرآة الموهوب.
smil79

حياك الله ياخوي الحبيب (مسلم ) والصراحة ونستني يوم قلت ان التمرية أضبطت معاكم ... هذي شهاده ( علامة الجودة ) راح أنعلقها بالمعهد حقنا ( معهد الولهان لتعليم طبخ زماان ) وبالعافيه عليكم ..

وعلى طاري الشيفه اليوم أخونا ( البيك ) راح يورطني حيث يقول (وياحظ الشيفه زوجتك.....ايها الشيف ) هذي اشلون اترقع

الله ايعيني اذا شافتها ام عبدالرحمن!!!

شكرا لك مرة ثانيه يالحبيب